Da quai da ventg persunas da l’Eritrea pudessan perder lur status sco persunas admessas provisoricamain. A quella conclusiun vegn il Secretariat da stadi per la migraziun SEM. En in project da pilot han ils collavuraturs controllà 250 dossiers da persunas da l’Eritrea ch'han chattà suttetg en Svizra.
Tar 9% dals controllads saja sa mussà che l’annullaziun dal status sco persuna admessa provisoricamain saja giuridicamain giustifitgada e proporziunala. Las persunas pertutgadas pon contestar la decisiun avant il Tribunal administrativ federal.
Nova pratica dapi dus onns
Avant dus onns aveva il SEM midà sia pratica visavi persunas da l’Eritrea. Dapi lura na tanscha la partenza illegala da l’Eritrea betg pli sco motiv da survegnir asil en Svizra. Persunas dal fatg eran vegnidas a la conclusiun ch’in return saja supportabel per quellas persunas ch'hajan prestà il servetsch naziunal u che sajan deliberadas da quel. Il mument controllescha il SEM ulteriurs 3'200 dossiers da las total 9'400 persunas da l'Eritrea admessas provisoricamain.
L’organisaziun «Agid svizzer als fugitivs» crititgescha l’agir dal SEM. I na dettia anc adina naginas infurmaziuns cumprovadas davart la situaziun dals dretgs umans en l’Eritrea.
RR novitads 11:00