Il fieu era rut ora curt avant las 8:00, sco la Polizia chantunala da l'Uri ha communitgà. In deposit da material da dismessa ha brischà cumplainamain cura ch'ils pumpiers èn arrivads. Quels han spert pudì controllar il fieu e stizzar quel. Annunzias da blessads n'hai dà naginas.
L'autezza dal donn material n'è per il mument anc betg clera. La via dal Gottard è – tenor communicaziun – puspè stada charrabla normal a partir da mesanotg. La recumandaziun da serrar fanestras e portas aboleschan las autoritads. La Polizia chantunala dad Uri ha cumenzà cun las investigaziuns en connex cun la raschun da l'incendi.
Pumpiers e guardia chemia en acziun
En acziun èn stads ils pumpiers da las vischnancas da Schattdorf, Bürglen, Altdorf e Spiringen, la guardia da chemia da l'Uri, l'uffizi per la protecziun da l'ambient, las auas persas Uri SA, ina interpresa da dismessa privata, il servetsch d'ospital d'Uri, sco er la polizia chantunala da l'Uri.
L'incendi aveva chaschunà grondas mulestas da l'odur. Maletgs da reporters da lecturs sin portals online han mussà ch'il fim nair è sur il center da recicladi. Il traffic enturn il lieu dal fieu è stà fermamain impedì. Betg pertutgà era il traffic sin l'autostrada A2 e sin ils binaris.