Siglir tar il cuntegn

Header

cuntegn

Incendi da guaud en il Tessin Fieu n'è anc adina betg dal tut sut controlla

En il chantun Tessin brischa il guaud anc adina. Er passa in'emna suenter ch'il fieu è rut ora al Monte Gambarogno n'è el anc betg dal tut sut controlla. In ferm vent ha plinavant impedì glindesdi bun'ura da duvrar helicopters da stizzar. Tenor la Polizia chantunala sajan anc adina enturn 50 pumpiers en acziun per cumbatter il fieu en divers lieus. La buna nova: Malgrà il ferm vent na saja il fieu betg sa derasà pli fitg. Ins saja sin buna via, ha il pledader da la polizia agiuntà.

Persunas han pudì turnar en lur chasas

32 persunas ch'eran vegnidas evacuadas pervi dal fieu or dal vitget Indemini, han puspè pudì turnar en lur chasas il venderdi passà. Il passagi da cunfin cun l'Italia sco er la via chantunala tras il territori d'incendi èn vegnids serrads per motivs da segirtad.

Raschun per l'incendi è tenor la polizia in fieu sin l'Alpe di Neggia che dus umens giuvens n'han betg stizzà endretg avant che s'allontanar.

audio
Per tadlar: Las novitads da las 15:00
ord RTR Audio dals 07.02.2022.
laschar ir. Durada: 3 minutas 24 Secundas.

RTR novitads 15:00

Artitgels legids il pli savens

Scrollar a sanestra Scrollar a dretga