Siglir tar il cuntegn

Header

cuntegn

Incumbensa gronda Recurs retardescha project da cloud da la Confederaziun

Cunter la surdada da servetschs da cloud a quatter interpresas americanas ed ina chinaisa è vegnì inoltrà in recurs. Quai vul dir, che questa fatschenta na po il mument betg vegnir serrada giu.

Il recurs saja vegnì inoltrà a temp, ha communitgà la Chanzlia federala. I sa tractia d'in affar current. Uss vegnia il Tribunal administrativ federal a decider davart il recurs.

La Confederaziun aveva surdà l'incumbensa gronda per 110 milliuns francs ils 24 da zercladur a las firmas americanas Amazon, IBM, Microsoft ed Oracle sco er al purschider da la China, Alibaba. Raschuns per quella surdada èn stads ils pretschs attractivs ed ils rabats. Ils cumpetitiders svizzers èn restads cun mauns vids.

Surdada dispitaivla

La surdada era vegnida crititgada: Marc Oehler, il directur d'ina interpresa dad IT cun atgna schliaziun da cloud, aveva ditg envers la gasetta «Le Temps», la Svizra perdia uschia sia suverenitat digitala. Ils purschiders svizzers n'hajan mai gì ina schanza, perquai che la concurrenza publica pretendeva centers da datas sin almain trais continents.

Betg inoltrà ina offerta aveva er la Swisscom. La concurrenza da la Confederaziun saja stada drizzada ora explicitamain sin purschiders dad uschenumnads Global Public Clouds, ha la Swisscom scrit la messemna sin dumonda da l'agentura da novitads Keystone-SDA.

Er politichers da la cumissiun da gestiun eran s'exprimids a moda critica. Il cusseglier naziunal da la PPS, Alfred Heer, aveva ditg envers Radio SRF, che la cumissiun da gestiun vegnia a prender sut la marella il process da surdada. E la cumissiun vegnia er ad examinar, tge datas che vegnian arcunadas en la cloud e tge che quai muntia per la segirezza da datas en Svizra.

Ord l'archiv da Radio SRF:

audio
La politica reagescha sin schliaziun da cloud dispitaivla
ord Echo der Zeit dals 09.07.2021. Maletg: Keystone
laschar ir. Durada: 4 minutas 58 Secundas.

RTR novitads 12:00

Artitgels legids il pli savens