Industria svizra pattescha

L'industria svizra è curdada ensemen il schaner uschè fitg sco dapi la crisa da finanzas il 2008 betg pli. Las incumbensas sajan marcantamain pli bassas ed i saja vegnì stritgà persunal. Quai resulta l'index da cumpra da la Credit Suisse.

Manaschi industrial, ina chascharia Bild in Lightbox öffnen.

Legenda da maletgs: Cun il franc ferm ha l'industria svizra pli grev da vender sia rauba en l'exteriur. RTR, C.Spescha

Cun in minus da 5,3 sin 48,2 puncts è l'index crudà sut la marca 50 puncts ch'inditgescha ina creschientscha. Quai è la pli gronda reducziun dapi il november 2008, il punct culminant da la crisa da finanzas.
La pli gronda influenza ha la plivalur dal franc svizzer, dapi che la Banca Naziunala Svizra ha abolì il curs minimal da l'euro. Tenor la Credit Suisse perda l'industria svizra radund 18 milliardas francs.

Radund 85% da las interpresas han gia decidì mesiras concretas. Il pli savens è vegnì numnà discurs cun ils furniturs per reducir ils pretschs, lura han tschertas interpresas era sbassà sez ils pretschs e circa 14 % dals manaschis planiseschan da transferir la producziun en l'exteriur.
Ina stgarsa maioritad da las interpresas quinta ch'il curs dal franc envers l'euro restia almain per in onn datiers da la paritad, 1 fr. = 1 euro.
(RR novitads 14:00)