En Svizra va la racolta da tartuffels quest’emna a fin cun ina nauscha bilantscha. La raschun sajan las malauras e la blera plievgia durant la stad. Uschia hai dà tartuffels pli pitschens e singuls cun stgarps.
Pommes e chips
Quai haja er influenza sin ils pommes chips ed ils pommes frites. Tar ils chips per exempel, possia dar ch'els hajan pitschens stgarps. Tar ils pommes frites saja la situaziun anc pli cumplitgada: i saja grev d'insumma producir pommes frites cun ils truffels racoltads. Quai ha declerà Ruedi Fischer, il president da l’Associaziun da producents da tartuffels svizzers envers SRF.
Cumpareglià cun l’onn passà saja la racolta sa reducida tranter 30 e 50 pertschient. Tar singuls manaschis saja la racolta schizunt dada cumplettamain en l’aua – uschia Ruedi Fischer.
Il Grischun ha gì cletg
Peter Brasser, il manader dal bain puril Tadi a Panaduz, ha pudì racoltar 15 tonnas tartuffels. Tenor el na saja la racolta betg stada uschè schletta: 10 enfin 15 pertschient pli pac che l'onn passà haja el racoltà. La pauca granella è segir in dals motivs principals daco che la racolta è stada meglra en il Grischun.
La famiglia Brasser venda lur tartuffels cunzunt en la butia da lur bain puril sco era ad intgins hotels ed ustarias. Els na vegnan uschia betg producì vinavant tar pommes frites u pommes chips.
Guardà sur l'entira Svizra n'è la racolta da tartuffels en il Grischun dentant betg da grond'impurtanza. Ils chantuns Berna, Vad e Fribourg han l'onn passà procurà per var 2/3 da tut ils tartuffels svizzers.