RTR ha er emess quest Point de presse via livestream. Da la partida èn stads:
- Patrick Mathys, Uffizi federal da sanadad publica
- Raynald Droz, Departament federal da defensiun, protecziun da la populaziun e sport
- Boris Zürcher, Secretariat da stadi per l'economia
- Martin Tschirren, Uffizi federal d'abitaziuns
- Hans-Peter Lenz, Departament d'affars exteriurs
- Colette Nova, Uffizi federal d'assicuranzas socialas
- Susanne Kuster, Uffizi federal da giustia
Patrick Mathys da l'Uffizi federal da sanadad infurmescha davart las cifras actualas en il mund. Cunzunt en l'Italia saja la situaziun vinavant dramatica. Ma er en Svizra saja il dumber d'infecziuns s'augmentà sin bunamain 9'000. Per di dettia bunamain 8'000 tests en Svizra.
Malgrà ch'il dumber d'infecziuns novas en il Tessin para da sa reducir, saja anc memia baud da discurrer dad in trend en questa direcziun.
Record tar lavur curta
Boris Zürcher dal SECO infurmescha davart il stan da la lavur curta en Svizra. Il mais da mars sajan fin uss vegnidas tschentadas 27'000 dumondas d'introducir lavur curta. Quai correspundia ad 8% da tut las firmas en Svizra.
Il medem mument accentuescha Zürcher che las pajas dal mars sajan garantidas. I saja però pussaivel che quellas vegnian per part cun intgins dis retard.
La liquiditad saja garantida. Per exempel survegnia er l'assicuranza cunter la dischoccupaziun sis milliardas francs supplementars. Las mesiras prendidas bastian almain per ils proxims dus, trais mais, uschia Zürcher.
Colette Nova da l'Uffizi federal d'assicuranzas socialas precisescha ch'er butias che sajan avertas, ma n'hajan nagins clients, possian tschentar la dumonda d'introducir lavur curta.
Midar chasa pussaivel – per part illusoric
Tenor Martin Tschirren da l'Uffizi federal d'abitaziuns saja vinavant pussaivel da far midada la fin dal mais. I na dettia nagin stop da midar chasa. Dentant saja en realitad fitg difficil da midar chasa e da resguardar las mesiras d'igiena. Las associaziuns da locataris recumondian perquai da desister da midar chasa il mument – là nua che quai saja pussaivel.
Il cusseglier federal Guy Parmelin haja incumbensà ina gruppa da lavur che duaja elavurar schliaziuns cun ils partenaris en connex cun dumondas da locaziun. Impurtant saja dentant vinavant che locataris e locaturs tschertgian il dialog, sch'i dat problems.
Augmentà dispositiv da sanitad da l'armada
Raynald Droz dal VBS annunzia che differents dispositivs sajan vegnids augmentads. Quai cunzunt tar la sanitad. En il focus saja il mument sin la Svizra franzosa. Plinavant haja l'armada survegnì 3'000 dumondas da far lavur voluntara. 100 persunas qualifitgadas sajan vegnidas tschernidas.
«Solidaritad vivida» areguard repatriaziuns
Sco Hans-Peter Lenz dal Departament d'affars exteriurs explitgescha, cuntinueschian las repatriaziuns da burgais che sa chattian en l'exteriur. Damai che betg tut ils sgols na possian vegnir emplenids cun Svizras u Svizzers, vegnian er persunas dals pajais vischins repatriadas. Quai en il senn d'ina «solidaritad vivida». Da l'autra vart vegnian er Svizzers per part repatriads p.ex. cun sgols da la Germania.
