In'allianza independenta vul impedir cun in'iniziativa ils exports d'armas en pajais cun guerra civila. L'uschenumnada iniziativa da correctura duai dentant vegnir lantschada sulet, sch'i vegn rimnà aifer duas emnas 25'000 suttascripziuns.
Cussegl federal surpassia lingia cotschna
Sco quai che l'allianza communitgescha surpassia il Cussegl federal ina lingia cotschna cun schluccar l'ordinaziun per exports d'armas e lubir exports d'armas er en pajais cun guerra civila. Gia il 2014 haja il parlament schluccà questa ordinaziun, cura ch'el haja decis da lubir exports d'armas er en pajais che surpassan fermamain ils dretgs umans.
Referendum en furma d'iniziativa
Davos l'allianza stattan tranter auter represchentants da la PS, PBD, Verdliberals e la partida evangelica. Perquai ch'i na saja betg pussaivel da far in referendum cunter ina midada d'ina ordinaziun, sa tractia tar questa iniziativa da correctura d'in referendum en furma d'iniziativa.
RR novitads 11:00