Siglir tar il cuntegn

Header

Navigaziun

Grafica RTR
Legenda: Malgrà simpatia actuala pudess quai tuttina dar in Na a l'urna tenor la retschertga da gfs.berna. Grafica RTR
cuntegn

Svizra Iniziativa cunter la construcziun dischordinada fiss approvada

Sch'i fiss vegnì votà il cumenzament da december avessan 63% da las votantas e dals votants acceptà l'iniziativa dals giuvens Verds. Quai mussa ina retschertga da l'institut gfs.berna per incumbensa da la SRG SSR.

Las Svizras ed ils Svizzers n'èn anc betg s'occupads fitg cun la proxima votaziun federala. Uschia decleran ils politologs tranter auter la simpatia per l'iniziativa che vul restrenscher la construcziun ordaifer zonas da bajegiar.

I dettia dentant arguments PRO: Bleras persunas hajan il sentiment ch'i saja vegnì bajegià memia sparpaglià l'ultim temp e ch'ins stoppia far insatge encunter, declera Lukas Golder da l'institut gfs.berna. Tuttina quinta el plitost cun in Na en la votaziun dals 10 da favrer 2019, surtut perquai ch'ils arguments CONTRA na sajan anc betg uschè enconuschents e perquai che surtut las consequenzas economicas na sajan anc betg uschè en il focus.

Il Cussegl federal propona da refusar l'iniziativa dals giuvens Verds, che han inoltrà quella l'onn 2016 cun passa 113'000 suttascripziuns.

L'iniziativa prevesa che las zonas da construcziun na vegnan betg pli extendidas. Novas zonas da bajegiar duai quai be dar, sch'ina surfatscha da la medema dimensiun e cun ina qualitad da terren cumparegliabla vegn prendida ord la zona. Qua tras duessi esser pussaivel da cultivar il terren da bajegiar existent a moda pli effizienta.

La retschertga

Personen-Box aufklappenPersonen-Box zuklappen

L'institut gfs.berna ha fatg la retschertga per incumbensa da la SRG/SSR e quai cun dumandar 3028 votantas e votants tranter ils 4 ed ils 13 da december 2018. La quota da sbagl munta a +/- 2.9%.

Legenda: Guardar il video 63% fissan per iniziativa cunter construcziun dischordinada. Durada 00:57 minutas.
Or da Telesguard dals 21.12.2018.

RR actualitad 06.00