«Distgargiar pajas, imponer a moda gista taglia sin il chapital» - ni curt l'iniziativa da 99 pertschient. Ella pretenda che las entradas ord chapital, sajan quai ussa tschains ni dividendas, vegnan suttamessas ad ina taglia da 150 pertschient da la taglia sin lavur, quai sch'ellas surpassan ina tscherta summa ch'il Parlament federal fixescha pli tard.Curreger in svilup malsaun
Las entradas supplementaras tras la taglia duain vegnir duvradas per sbassar las taglias per persunas cun pajas bassas ni mesaunas ni duain finanziar il bainstar social. La finamira principala da l'iniziativa saja da crear uschia dapli gistadad sociala, di la cussegliera naziunala socialdemocrata Jacqueline Badran.
«Ils ultims 20 onns avain nus distgargià adina dapli quels che vivan dals gudogns da lur chapital e chargià quels che vivan da lur lavur, ils 99 pertschient, cun dapli taxas perquai ch’insatgi stoppia era finanziar las distgargias».
I saja dentant gia ussa uschia che quels che possedian dapli stoppian era pajar dapli taglia, respunda la cussegliera naziunala Esther Friedli da la Partida populara da la Svizra. Il sistem da taglia actual saja era la raschun pertge che la Svizra saja ina plazza economica uschè attractiva e da quai profiteschian tuts.
«La sanestra emblida adina che mo perquai che nus avain ina tala plazza economica attractiva pudain nus pajar en uschè bler en la furmaziun ed il bainstar social. Sche nus n’avain betg pli quai lura croda quai davent. L’iniziativa è in veritabel bumerang».
Privel per il bainstar da la Svizra
La Svizra dovri persunas ed interpresas bainstantas ch’investeschian lur daners e stgaffeschian uschia era plazzas da lavur e bainstanza per tuts. L'iniziativa propagheschia qua ina cultura da scuidanza, in cumbat cultural che fetschia donn a tuts, di Friedli.
«Quai è in’iniziativa malponderada, gea perfin communista che na vegn era betg sustegnida da tuts da la sanestra. Nus stuain dir na a l’iniziativa perquai ch’ella faschess donn a la plazza economica da la Svizra e midass tut noss sistem e manass ad in exodus».
Da quellas paraulas raquintian ils adversaris gia dapi passa 20 onns a la populaziun, sa vilenta Jacqueline Badran. Las cifras mussian in tut auter maletg. Las investiziuns en plazzas da lavur sajan idas enavos massivamain e 75 pertschient dals gudogns tras dividendas na vegnian betg dabun a la populaziun svizra mabain giajan en l’exteriur.
«Cun quels daners subvenziunain nus las cassas da pensiun americanas ni bancas internaziunalas da l’America. Da quai n’avain nus insumma nagut. I n’è betg la vardad ch’i dat grondas investiziuns ni bleras plazzas da lavur che vegnian creadas».
Decisiun l'auter onn
Curregia l'iniziativa in svilup malsaun e procura per dapli gistadad - ni metta ella en privel la pasch publica ed il success economic da la Svizra? Probabel l'auter onn vegnan las Svizras ed ils Svizzers a decider a l'urna davart l'iniziativa da 99 pertschient.