Il Cussegl naziunal propona da refusar l'iniziativa da limitaziun da la Partida populara Svizra. Malgrà ch'il resultat era da spetgar, han passa 70 commembers dal Cussegl naziunal prendì posiziun davart l'iniziativa. Suenter ina debatta da radund 8 uras ha la Chombra gronda a la fin decis da proponer in Na a l'iniziativa. Quai cun 123 cunter 63 vuschs e trais abstenziuns. Per l'iniziativa ha sulettamain la PPS vuschà.
Iniziativa vul franar cunvegna davart la libra circulaziun
L'iniziativa vul metter ord vigur la cunvegna davart la libra circulaziun da persunas cun la UE – quai sche la Svizra na vegnia betg da sa cunvegnir cun l'Uniun Europeica entaifer in onn. Ord vista da la PPS duai l'iniziativa impedir ina Svizra cun passa 10 milliuns abitants, dentant senza ina limita e contingents.
Auter che tar l'iniziativa cunter la migraziun da massa or dal 2014 pretenda l'iniziativa explicit che la cunvegna davart la circulaziun libra vegnia visada. Perquai che la cunvegna è liada vid sis autras leschas, fiss l'iniziativa probabel la fin per las bilateralas 1. Il Cussegl federal refusa l'iniziativa. Sco proxim va la fatschenta en il Cussegl dals chantuns.
RR novitads 18:00