Siglir tar il cuntegn

Svizra Iniziativa da limitaziun: PPS ed ASIN pon rimnar suttascripziuns

La Partida populara svizra po cumenzar a ramassar suttascripziuns per sia iniziativa da limitaziun. La chanzlia federala ha examinà l'iniziativa e ses text, e l'ha dà liber per il proxim pass.

differents pass da l'exteriur
Legenda: L'iniziativa vul sistir la cunvegna cun l'UE davart la circulaziun libra da persunas. Keystone

L'iniziaitva da la Partida populara svizra (PPS) e l'Acziun per ina Svizra independenta e neutrala (ASIN) vul abolir la cunvegna davart la libra circulaziun da persunas. La chanzlia federala ha examinà il text da l'iniziativa e publitgà el en il fegl uffizial federal.

Sistir immediat la cunvegna da circulaziun libra da persunas

Sco gia l'iniziativa d'immigraziun da massa pretenda l'iniziativa da limitaziun che la Svizra po controllar sezza l'immigraziun. Plinavant survegn il Cussegl federal l'incumbensa da prender ord vigur la cunvegna cun l'Uniun europeica davart la libra circulaziun da persunas aifer in onn – e sche necessari da visar la cunvegna.

PPS ed ASIN betg cuntentas cun lavur dal parlament

L'iniziativa han la PPS e la ASIN lantschà communablamain. Las organisaziuns han reagì uschia sin la realisaziun da l'iniziativa cunter in'immigraziun da massa. Questa n'haja il parlament betg realisà cumplettamain.

Ils iniziants han temp fin ils 16 da fanadur 2019 per rimnar las 100'000 suttascripziuns necessarias per ina votaziun al pievel.

RR novitads 10:00