Il Cussegl naziunal ha refusà cun 168 cunter 18 vuschs la cuntraproposta indirecta a l'iniziativa da transparenza – quai cun 9 abstenziuns. Avant era la lescha vegnida mitigiada dal Cussegl dals chantuns, quai ch'ha motivà la sanestra da refusar il project.
La cussegliera naziunala da la PS da Basilea-Champagna, Samira Marti, ha argumentà en spezial per in duair da revelaziun dals nums da donaturs a partidas politicas. Sch'ils nums da donaturs na stoppian betg vegnir numnads, na saja quai nagina cuntraproposta a l'iniziativa. Cunquai ch'ina maioritad dal Cussegl naziunal vul mantegnair l'anonimitad da donaturs, refuseschia la PS quest project, uschia Marti.
Ed er Nadine Masshardt da la PS da Berna ha argumentà che la PS sustegnia la cuntraproposta be, sche il duair da revelar ils nums da donaturs gronds na vegnia betg stritgà.
La finala han tut las fracziuns auter che quella da la PLD refusà en la votaziun la cuntraproposta. Il project va uss enavos en il Cussegl dals chantuns.
