L'iniziativa pretenda da fixar en la constituziun che la protecziun da l’ambient stettia da nov en il center. Activitads economicas dastgan duvrar mo uschè bleras resursas ed emetter mo uschè bleras substanzas nuschaivlas sco quai ch'il planet po supportar e regenerar. Els discurran en quest connex da l'impronta ecologica.
E lezza mussa il mument che la Svizra dovra fitg bleras resursas. Vivessan tuts uschia sco la Svizra lura duvrassi atgnamain las resursas d’almain dus planets e mez. Che quai na va betg vinavant uschia e ch'ins sto ussa far insatge cunter quest svilup, da quai èn ils aderents da l'iniziativa persvas. Ed era ch'i stoppia ir spert. L'iniziativa per la responsabladad vers l'ambient pretenda che la Svizra reduceschia ses diever da resursas sin in nivel equilibrà, quai entaifer diesch onns suenter in gea a l'iniziativa.
Auts custs
Ils adversaris da l’iniziativa crititgeschan il termin enfin che l'iniziativa duai esser realisada. Diesch onns saja in temp fitg curt che pretendess intervenziuns massivas en l'economia svizra. Intervenziuns che avessan per consequenza che la Svizra na pudess betg pli concurrer sin il martgà internaziunal. Products per ni da la Svizra stuessan ademplir criteris bler pli severs che quels da la concurrenza da l’exteriur. I dovria qua ina coordinaziun internaziunala e betg in agir memia a la sperta. Ultra da quai duvrassi investiziuns da milliardas en l’economia e l’infrastructura svizra. Daners che na stettian, en vista a las stretgas finanzialas da la Confederaziun, betg a disposiziun.
Far nagut fiss pli char
Tenor ils aderents da l’iniziativa custass in betg agir dentant anc bler dapli, din ils aderents da l’iniziativa. La fin finala giaja per nagut auter ch'il surviver da la carstgaunadad. Las consequenzas da noss agir, da l'explotaziun senza resguard, sentian nus gia oz. Undas da chalira, malauras, auas tartagnadas e la muria d'insects sajan mo intgins exempels. L'economia possia mo lura prosperar a lunga vista sch'ella saja persistenta. La pretensiun da l'iniziativa na saja perquai era betg stravagada, mabain fitg simpla. La basa da viver dal carstgaun e da l’ambient na dastgia betg vegnir destruida.
Naginas mesiras concretas
Mesiras concretas na chattan ins betg en il text da l'iniziativa. Quellas duai il Parlament federal decider suenter che l'iniziativa è acceptada. Mo sch'ins taidla ils iniziants vegni cler che la mobilitad e l'alimentaziun stattan el center. Pli pauca charn sin il taglier, persuenter dapli legums e fritgs e velo, bus e tren enstagl da auto ed aviun. Mo uschia saja il collaps d'evitar, din ils aderents da l'iniziativa.
