Persunas pensiunadas duain survegnir ina 13avla renta da l’AVS. Quai pretendan ils sindicats ensemen cun la partida socialdemocratica ed organisaziuns per seniors. A Berna han quellas gruppaziuns lantschà il mardi il cumbat da votaziun. I na giaja betg per in regal, mabain per garantir ina vita degna en la vegliadetgna. Quai en vista als custs da viver che creschian ad in crescher – uschia ils iniziants. Pervi da la chareschia e las premias da las cassas da malsauns hajan las persunas pensiunadas pli u main pers entradas en l'autezza d'ina renta dal mais, dapi il 2021. Entras la chareschia ed ils tschains bass sa sminueschia era la renta da la cassa da pensiun, quai malgrà pli autas contribuziuns.
L'iniziativa vul concret ch'i dettia in supplement annual a la renta, per l'import dad in 12avel da la renta annuala. Impurtant saja dentant che las prestaziuns supplementaras na sa reduceschian betg entras questa mesira, e che nagin na perdia betg il dretg sin prestaziuns supplementaras. Co che quella purschida duai vegnir finanziada na definescha l'iniziativa betg.
Il suveran svizzer decida ils 3 da mars a l’urna davart l’iniziativa «Viver meglier en la pensiun».
