Tenor il text d’iniziativa duain mo pli manaschis purils survegnir subvenziuns che pon mussar si, ch'els produceschan tenor criteris ecologics. Ils criteris cumpiglian la biodiversitad, ina producziun senza pesticids e da tegnair mo il dumber d'animals che po vegnir pavlà sulettamain cun nutriment producì sin il bain puril.
Manaschis purils che dovran antibiotica regularmain e sco mesira profilactica, na duain era betg pli survegnir subvenziuns. Il medem duai valair per la perscrutaziun, cussegliaziun ed educaziun agrara. I duai mo pli dar subvenziuns per quels che promovan in'agricultura persistenta.
Tenor ils iniziants «aua netta per tuts» fetschia quai prescha. Perquai che l’utilisaziun intensiva da pesticids, d'antibiotica e da bler pavel dad animals che vegn importà da l'exteriur smerdia l'aua, destrueschia la biodiversitad, fetschia donn als funs e promovia bacterias resistentas a l'antibiotica.
RR novitads 15:00