Netto null fin il 2050. Quai vul l’iniziativa per ils glatschers. Davent dal 2050 na duai la Svizra betg pli producir dapli CO₂ che quai che la natira po absorbar cun u senza agid tecnic. Era duain betg pli vegnir duvrads carburants sco ieli, benzin, gas u diesel.
Sandra Locher-Benguerel è pro
La Socialdemocrata sustegna l’iniziativa. Che l’urgenza saja auta mussia era il pli nov rapport da l’IPCC. Locher Benguerel sustegna era la cuntraproposta directa dal Cussegl federal. Per lez va l’iniziativa numnadamain en divers puncts memia lunsch. Perquai debattescha il Cussegl naziunal en la sessiun da primavaira era davart la cuntraproposta. Era quella ha la finamira da netto nulla fin il 2050. Ella na vul dentant betg scumandar ils carburants dal tuttafatg. La cuntraproposta cuntegna era excepziuns per las regiuns da muntogna.
Magdalena Martullo-Blocher è cunter
Memia pauc concreta è l’iniziativa per la politicra da la PPS. Be cun energia solara na possian ins betg cuvrir il basegn d’energia, di Martullo-Blocher. A lunga vista vesa ella plitost la construcziun d’ina nova ovra atomara per producir avunda energia per la Svizra. Per il rument radioactiv sa lascha tenor ella era bainbaud chattar ina soluziun en Svizra. Ed ella agiunta che gia oz vegnia sustegnida l’energia regenerabla.
La debatta sur da l’iniziativa dals glatschers empermetta da vegnir intensiva.