Siglir tar il cuntegn

Header

cuntegn

Inoltrà iniziativa Pajar taglia independent dal stadi civil

Umens e dunnas duain vegnir suttamess a la taglia independent da lur stadi civil. Quai pretenda ina iniziativa populara ch'in comité da dunnas da la PLD ha inoltrà gievgia. Sco ch'els scrivan en ina communicaziun, hajan els surdà passa 112'000 suttascripziuns valaivlas a la Chanzlia federala.

Gievgia vegnan pèrs maridads e pèrs omosexuals che vivan en in partenadi registrà suttamess communablamain a la taglia. Sche tuts dus lavuran ston els – pervi da la progressiun – pajar dapli taglia che pèrs da concubinat cun duas imposiziuns da taglia separadas.

Tenor l'iniziativa duai questa discriminaziun da pèrs maridads vegnir abolida il pli tard trais onns suenter ch'il pievel e la maioritad dals chantuns ha approvà ella.

Schebain il pievel vegn dentant insumma a vuschar davart la fatschenta è intschert. Il cussegl federal lavura gia vid ina imposiziun da taglia individuala. Las dunnas da la PLD han tuttina inoltrà lur iniziativa, perquai ch'il squitsch stoppia vegnir mantegnì.

audio
Per tadlar: curt e cumpact
ord RTR Audio dals 08.09.2022.
laschar ir. Durada: 1 minuta 2 Secundas.

RTR novitads 17:00

Artitgels legids il pli savens

Scrollar a sanestra Scrollar a dretga