La Svizra duai evacuar dapli fugitivs or dals champs en la Grezia. Quai pretendan trais petiziuns che vegnan sustegnidas da var 50’000 persunas e 130 organisaziuns. Tenor ils petiziunaris stoppia la Svizra far dapli per proteger ils fugitivs – la situaziun dals fugitivs saja sa pegiurada las ultimas emnas entras il coronavirus sco er las tensiuns al cunfin tranter la Grezia e la Tirchia. Enfin uss haja la Svizra prendì si be 23 giuvenils minorens. Quai na tanschia betg, ha ditg Alexandra Karle, la manadra da gestiun da Amnesty International Svizra.
Plinavant pretendan las petiziuns ch’il Cussegl federal s’engascha per ina refurma dal sistem da Dublin. La Svizra profiteschia numnadamain da quest sistem, perquai che quasi nagins fugitivs vegnian uschia insumma en Svizra. Vitiers vegnia che la Svizra mainia enavos a moda sistematica requirents d'asil en ils pajais nua ch'els sajan vegnids registrads sco emprim. La Svizra duai sa metter en per ina midada da quest sistem ed er per ch'ils fugitivs vegnian repartids a moda gista sin l'entira Europa.