Inquisiziun en connex cun ina cunvegna cun la PLO

Las cumissiuns da gestiun dal parlament pretendan dal Cussegl federal ch'el sclereschia svelt e cumplet la probabla cunvegna secreta tranter la Svizra e l'organisaziun per la liberaziun da la Palestina PLO ils onns 70. Era la procura publica federala è en il visier da las cumissiuns.

foto nair ed alv, monument da Würenlingen, sanester sesa glieud, dretg èn ils cranzs da condolenza Bild in Lightbox öffnen.

Legenda da maletgs: Il monument che regorda a las unfrendas da l'attentat sin in aviun da la Swissair, 1970 a Würenlingen. Keystone

Las renfatschas, ch'i haja dà ina cunvegna secreta suenter ch'in aviun era crudà a Würenlingen taxeschan las cumissiuns da gestiun sco gravantas. I va per la dumonda sche las autoritads giuridicas han dà suenter al squitsch politic ed han perquai desistì d'ina procedura penala. Damai ch'i dettia entant ina gruppa da lavur interparlamentara da la Confederaziun, desistan las cumissiuns da gestiun d'ina atgna inspecziun.

Bumba en eroplan da la Swissair

En il chantun Argovia, a Würenlingen è capità il favrer 1970 la pli greva d'ina entira seria d'attatgas da la PLO, l'organisaziun da liberaziun palestinaisa. Ils 21 da favrer 1970 è exploì curt suenter la partenza ina bumba en il caum da bagascha d'in aviun da la Swissair. Il capitani ha empruvà da returnar a Kloten, la maschina è dentant crudada giu en in guaud sper Würenlingen. Ils 38 passagiers e las 9 persunas da l'equipa èn mortas.

Tenor retschertgas dal schurnalist Marcel Gyr haja l'anteriur cusseglier federal Pierre Graber (PS) fatg ina cunvegna secreta u ina cunvegna da moratori cun la PLO, quai per impedir ulteriuras attatgas sin miras svizras. Persuenter ha la Svizra garantì a la PLO (ch'era da gliez temp in'organisaziun terroristica) il sustegn sin parchet internaziunal.

RR novitads 12:00