Christian Menn è morts il glindesdi passà en la vegliadetgna da 91 onns. Menn vala sco in dals pli impurtants construiders da punts en la Svizra. Igl inschigner è sta involvì en la construcziun da passa 100 punts sin l'entir mund. Menn ha frequentà la scola chantunala da Cuera, silsuenter studegià a Turitg sin la scola politecnica federala. Dapi il 1971 ha el lavurà sco professur per statica da construcziun e construcziun sin l'ETH.
Center da lavur en il Grischun
Menn era enconuschents per sias punts sin l'entir mund. Siu center da lavur è dentant adina stà il Grischun. Tranter auter è el stà responsabels per la construcziun da la punt dal Rain a Rehanau ni la punt dal Sunniberg a Claustra.
RR novitads 23:00
