Las lavurs per l'urari duain vegnir instradadas immediat, a chaschun dal Forum mundial d'economia il schaner a Tavau, quai ha communitgà Ignazio Cassis suenter l'inscunter cun il vice-cumissari da l'Uniun europeica Maros Sefcovic. Omaduas varts han sincerà ch'ellas veglian lavurar ensemen.
En ina conferenza da medias separada ha Maros Sefcovic accentà che l'Uniun europeica saja pronta da manar in dialog politic intensiv cun la Svizra. I drovia da vart da la Svizra dentant ina clera voluntad da prender per mauns las dumondas instituziunalas sco per exempel l'adopziun dal dretg dall'UE e las proceduras per dustar dispitas. Cler saja era ch'ins spetgia da la Svizra contribuziuns finanzialas regularas per avair in access da privilegis a la fiera interna dal'UE. Nagin moviment ha l'inscunter denter Cassis e Sefcovic purtau en la dumonda da la participaziun da la Svizra al program da perscrutaziun «Horizon Europe». Tenor Sefcovic stoppia l'UE aunc ponderar co cuntinuar. Decisiv vegnia dentant ad esser co la relaziun generala tranter la Svizra e l'UE sesviluppeschia, ha el accentuà.