Siglir tar il cuntegn

Svizra Inscunter dad 800 anteriurs uffants plazzads

A Mümliswil en il chantun Soloturn èn s'inscuntrads radund 800 anteriurs uffants plazzads ed autras unfrendas da mesiras per motivs da provediment. A Mümliswil datti dapi il 2013 in lieu commemorativ naziunal per uffants plazzads ed uffants da chasa d'uffants.

Anteriurs uffants plazzads avant la Chasa federala.
Legenda: Anteriurs uffants plazzads ed autras unfrendas da mesiras per motivs da provediment avant la Chasa federala a Berna (maletg d'rachiv). Keystone

Questas persunas sajan las ultimas perditgas che hajan fatg tras quest chapitel stgir da la Svizra, communitgescha l'equipa da l'iniziativa da restituziun sco organisatura.

Igl è l'emprima giada en l'istorgia svizra ch'anteriurs uffants plazzads s'inscuntran. La festa communabla duai segnar la fin da l'iniziativa da restituziun ed il start per il nov project «bistro per raquintar». I duai daventar in lieu nua che pertutgads pon sa scuntrar e nua che l'atgna istorgia stat en il center.

9000 dumondas per ina contribuziun da solidaritad

En total han 9018 uffants plazzads ed autras unfrendas da mesiras per motivs da provediment inoltrà tar la Confederaziun ina dumonda per ina contribuziun da solidaritad. La Confederaziun ha tractà fin ussa 1'400 dumondas, sco prim da persunas grev malsaunas e persunas fitg attempadas. Cun ils emprims pajaments haja ins pudì cumenzar pli prest che planisà. Las unfrendas obtegnan ina contribuziun da solidaritad da 25'000.-- francs.

RR novitads 12:00