- Il procuratur public general Michael Lauber sto s'abstegnair a partir d'immediat tar cas che pertutgan la FIFA.
- Quai ha decis il Tribunal penal federal. Quel crititgescha massivamain l'agir dal procuratur public general en la procedura cunter quatter commembers dal comité d'organisaziun dal campiunadi mundial da ballape il 2006 en Germania.
- Pervi da ses inscunters betg documentads cun il president da la Federaziun internaziunala da ballape, Gianni Infantino saja Lauber «partischant», hai num en la sentenzia.
- La procura publica federala va d'accord cun la decisiun dal Tribunal penal federal e sclauda a partir dad uss Lauber da tut ils cas che pertutgan la FIFA.
Il mars 2015 ha la procura publica generala avert la procedura cunter ils funcziunaris da la FIFA dal comité d'organisaziun per il campiunadi mundial 2006 en Germania. Entant è il cumplex da cas creschì sin in dumber da 25. En il decurs da las investigaziuns han medias scuvert ch'il procuratur public general Michael Lauber è s'inscuntrà en il zuppà cun il president da la FIFA, Gianni Infantino. Il problem: Ils inscunters n'èn betg documentads, i na dat nagins protocols, tgi che ha ditg tge.
Nagina regurdientscha dal terz inscunter
Ils rapports discurran da trais inscunters informals, Lauber ha confessà dus da quests inscunters. Vid il terz na possia el betg sa regurdar. El pretenda che quests inscunters hajan adina gì lieu entaifer ses pensum sco procuratur public general. Quai n'influenzieschia betg l'independenza da la procedura.
Il Tribunal penal federal n'ha el betg pudì persvader cun quest argument. I restia «en emprima lingia betg cler», pertge che sia participaziun a quests inscunters saja stada relevanta per la procedura.
RR novitads 15:00
