Siglir tar il cuntegn

Header

cuntegn

Svizra Instrucziun da nudar resta obligatorica – er per mattas muslimas

Las autoritads svizras n'han betg vulnerà la libertad da religiun cun declerar obligatoric l'instrucziun da nudar per duas mattas muslimas. Quai ha decidì la curt per dretgs umans europeica a Strasbourg.

La decisiun da la curt per dretgs umans europeica a Strasbourg pertutga il cas d'ina famiglia che stat a Basilea. Las duas mattas da set e nov onns visitavan l'avust da l'onn 2008 ina scola primara là. Ellas n'han dentant betg visità las lecziuns obligatoricas da nudar. Discurs cun ils geniturs che hajan ragischs svizras e tircas n'hajan purtà nagut.

Il departament d'educaziun ha chastià ils geniturs il fanadur 2010 cun mintgamai 350 francs per figlia, total pia 700 francs. Las instanzas per recurs e reclamaziuns han renvià ils meds legals uschia ch'ils geniturs da las mattas avevan tratg il cas fin avant il tribunal federal a Losanna. En sia sentenzia aveva lez accentuà la grond'impurtanza da l'integraziun – cunzunt d'uffants da l'exteriur en nossa societad.

La curt per dretgs umans a Strasbourg ha uss sustegnì la sentenzia dal tribunal federal.

RR novitads 11:00

Artitgels legids il pli savens