Siglir tar il cuntegn
cuntegn

Svizra Integraziun da fugitivs via scolaziun

Il parlament pretenda scolaziuns specificas per fugitivs e per persunas recepidas temporarmain. Suenter il Cussegl naziunal ha er il Cussegl dals chantuns acceptà ina moziun che pretenda da nizzegiar meglier il potenzial da fugitivs. Uschia duain els vegnir integrads meglier en il martgà da lavur.

Ina persuna che scriva insatge sin il palpiri.
Legenda: Integraziun cun l'agid da scolaziun. Uschia duain fugitivs s'integrar pli svelt en il martgà da lavur - e daventar independents d'agids socials. Keystone

Il Cussegl dals chantuns vul integrar fugitivs meglier en il martgà da lavur. El ha acceptà ina moziun da Martina Munz (PS/SH) che pretenda da nizzegiar meglier il potenzial da fugitivs renconuschids e dals recepids temporarmain. La decisiun è crudada cun 29 cunter 9 vuschs e 3 abstenziuns.

La politicra da la PS Martina Munz.
Legenda: Ha inizià la moziun: La politicra da la PS Martina Munz. Keystone

Scolaziun è lingua sco puncts centrals

Las scolaziuns specificas duain vegnir purschidas en branschas cun mancanzas da spezialists e terminadas cun in attest professiunal federal. La mesadad fin dus terzs dals fugitivs e tals ch'èn recepids temporarmain hajan gia ina scolaziun u in’experientscha professiunala pratica, hai num en la moziun.

Il december passà aveva la regenza decis da cumenzar il 2018 in project da pilot per l’integraziun da persunas recepidas temporarmain en il martgà da lavur. Latiers èn dus puncts centrals. Primo: Fin 1’000 fugitivs per onn duain survegnir ina scolaziun specifica. Secundo: Ils fugitivs duain gia baud emprender la lingua locala.

PPS ha fatg resistenza - adumbatten

Il tenor en la Chombra pitschna era che fugitivs duain avair ina lavur pajada empè da viver da l’agid social. Suenter 10 onns sajan numnadamain be la mesadad dals fugitivs renconuschids en Svizra integrads en il martgà da lavur.

La PPS cumbattì la moziun en omadus cussegls. Uschia ha il cusseglier dals chantuns Werner Hösli (GL) dumandà: «Per mai èsi ina cuntradicziun d’integrar temporarmain recepids en il martgà da lavur – u chapesch jau fallà il status?»

Il Cussegl federal dentant ha sustegnì la moziun. Blers inscunters cun fugitivs hajan mussà - uschia la cussegliera federala Simonetta Sommaruga - che tals umans hajan savens «ina nunditga fom per scolaziun».

RR novitads 12:00