Tgi che chamina tras la promenada da Tavau, inscuntra blers pavigliuns che tematiseschan l’intelligenza artifiziala. Il tema è omnipreschent, era sco in dals top-temas en las discussiuns da podi en il center da congress a Tavau. Dad udir è la gievgia er il fundatur da Chat GPT Sam Altman.
IA en il mintgadi
A la fin vegn IA ubain l'intelligenza artifiziala ad influenzar mintga branscha. Già oz vegn empruvà d'implementar ella en il mintgadi. Uschia datti emprovas tar las organisaziuns d’urgenza d'implementar ina traducziun automatica, sch'insatgi telefona e na discurra betg la medema lingua sco la persuna da l'autra vart dal telefon. Quai di Dominik Scherrer, ch'è cussegliader tar ina firma ch'elavurescha datas. El declera era ch’ins emprovia per exempel da gidar a policistas e policists da pudair analisar cas bler pli effizient cun IA.
IA è dentant era preschenta en auters secturs. Uschia duain mammografias vegnir pli exactas cun agid da la tecnologia, declera Janette Wiget ch'è la scheffa da finanzas d'ina firma ch'investescha en differents projects dad intelligenza artifiziala.
Dad avantatgs enfin dischavantatgs – tut è tema en il rom dal Forum mundial d'economia.
Il WEF cumbatta cunter infurmaziuns faussas en las medias socialas
Il forum mundial d'economia a Tavau cumbatta cunter infurmaziuns faussas derasadas durant l'inscunter. In problem dal qual er il directur dal WEF Alois Zwinggi è pertschert. Sco quai ch'el ha annunzià, veglia el far frunt al maldiever. Durant il WEF èn vegnids derasads videos cun pleds da podium ch'i n'ha mai dà. I sa tracta da purtrets generads d'intelligenza artifiziala. Zwinggi ha annunzià ina iniziativa cun interpresas da medias. Ella duai tractar il tema «duvrar intelligenza artifiziala cun responsabladad».
