Tenor in studi da la HTW Cuira han bunamain trais quartas da las interpresas grondas en Svizra, cun 250 e dapli collavuraturs, gia installà in post d'annunzias per whistleblowers. Quai èn collavuraturs che scuvran malfatgs e cumportaments illegals en lur firmas. Tar las fatschentas mesaunas e pitschnas èn tals posts anc scarts, mo mintga dieschavla ha gia endrizzà in.
Savens denunzià cun raschun
Denunzias survegnan interpresas grondas en la media var 50 ad onn, tar fatschentas pitschnas e mesaunas è quai il cas mo fitg darar. Da las denunzias ch’interpresas svizras han survegnì l’onn passà, è mintga segunda stada relevanta.
Denunzias che vegnan fatgas cun malart e per disfamar persunas, èn fitg raras tenor il studi da la Scol'auta da tecnica ed economia a Cuira. Sulettamain 3% da las annunzias vegnan valitadas sco nuncorrectas.
Passa 300 interpresas han respundì
Il studi ha la HTW Cuira fatg ensemen cun la Integrity Line GmbH ch’introducescha e gestiunescha tals sistems da denunziar El sa basa sin ina retschertga online e duai valair per la Svizra tudestga e la Svizra franzosa. 364 interpresas svizras hajan respundì. Vitiers han ils auturs dal studi fatg intervistas cun 26 represchentants d’interpresas svizras activas er en l’exteriur.
RR novitads 17:00