La partida da l'extrema dretga tudestga Alternative für Deutschland AfD vegn confruntada dapi la fin d'emna cun critica. Tenor retschertgas dals emetturs tudestgs WDR e NDR e la gasetta Süddeutsche Zeitung SZ haja ina firma da farma svizra pajà tranter il fanadur e setember 2017 radund 130'000 euros en transchas da var 9'000 francs a la secziun Lai da Constanza da l'AfD.
Alice Weidel actualmain en il center da l'affera da donaziuns
Pervi da questas transacziuns vegni confruntada uss la vicepresidenta da l'AfD, Alice Weidel, cun pretensiuns da sa retrair da ses uffizi, rapporta l'agentura da novitads svizra SDA.
Ella saja para cumparida sco finamira da las donaziuns. Weidel ha dentant declerà avant las medias, ch'ella saja vegnida a savair il settember 2017 l'emprima giada da las donaziuns e ch'ella saja stada suenter per dar enavos ils raps. Ella na disponia da «naginas infurmaziuns» davart ils possessurs da la firma da farma u dals motivs da la donaziun.
Donaziuns per partidas ord da pajais betg da l'UE èn illegalas
Cun acceptar la donaziun da 130'000 euros ha l’AfD probabel cuntrafatg a la lescha da partidas, quai pervi che donaziuns ord da pajas betg en l’Uniun europeica èn illegalas. Ils daners èn para vegnids surdads il 2017 ad ina secziun da l’AfD. L'avrigl da quest onn haja la partida pajà enavos ils daners, mussan para las retschertgas.
RR novitads 06:00
