Siglir tar il cuntegn

Header

audio
Davos 1917: Sfidas ed aspectativas da la seria
Or da Actualitad dals 15.12.2023. Maletg: SRF
laschar ir. Durada: 3 minutas 40 Secundas.
cuntegn

Intrigas, manzegnas e mort Nova seria da SRF – «Davos 1917»

L'onn 1917 – l'Europa sa chatta amez l'Emprima Guerra mundiala che devastescha il mund. Il lieu da cura Tavau para percunter sco ina oasa da la pasch. La pasch trumpa dentant – Il lieu sontget è plain d'agents e consulats internaziunals. L'istorgia da la nova seria da SRF «Davos 1917».

Seria d'agents cun elements istorics

Intrigas, manzegnas e la mort – quai sa zuppa davos la culissa naventada da la nova seria da SRF «Davos 1917» – Amez: la tgirunza grischuna Johanna Gabathuler. La dunna intelligenta serva durant l'Emprima Guerra mundiala a la front sco tgirunza.

En la patria grischuna returna ella cun in uffant en il venter che vegn, curt suenter la naschientscha, separà da la mamma desperada.

Sin la tschertga da sia figlia, sa lascha la tgirunza en sin persunalitads malignas e gieus perfids – tranter auter er il servetsch secret tudestg.

Critica da film

Sco aspectatur vegn ins tratg dad ina culissa en la proxima – da las salas noblas – en hittas modestas – en la natira naventada grischuna – fin en il guaud tudestg. Entras las bleras midadas da szenas, sa sviluppa ina tensiun per il aspectatur. Rinforzà vegn la tensiun entras in u l'autra szena brutala, cun bler saun e sbragim – nagut per nerva debla.

Ils costums, las gasettas, schizunt ils utensils d'operar, tut sto esser istoric. Per construir la citad da Tavau da l'onn 1917 ha la producziun er luvrà cun programms d'animaziun. Quels han agiuntà edifizis e persunas en purtrets filmads sco szena reala. Las animaziuns na pon però betg propi persvader perquai ch'ins vesa sin l'emprima egliada ch'ellas èn animadas.

Tut en tut san ins dentant dir che la seria è fitg captivanta cun maletgs impressiunants ed acturs ed acturas che persvadan.

audio
Davos 1917: ina critica da film
ord Actualitad dals 18.12.2023. Maletg: SRF
laschar ir. Durada: 4 minutas 24 Secundas.

Behind the scenes

Betg mo a Tavau è vegnì filmà – Era Vulpera e schizunt la Germania èn stads lieus da filmar.

A Vulpera avain nus chattà ina via principala ch'era perfetga per represchentar il Tavau istoric.
Autur: Stefan Eichenberger Coproducent da «Davos 1917»

Ina da las sfidas principalas da la producziun era l'aura, manegia Stefan Eichenberger. La naiv saja damai essenziala per l'istorgia – l'uschenumnà unique selling point.

Dentant: la naiv na vuleva betg vegnir. Pir la notg avant l'emprima filmada hai dà naiv.

La naiv è stada in regal gigant per nus – il meglier ch'avess pudì schabegiar.
Autur: Stefan Eichenberger Coproducent da «Davos 1917»
Dreharbeiten von «Davos 1917» im Schnee
Legenda: Lavurs da filmar en la naiv. SRF

RTR actualitad 12:00

Artitgels legids il pli savens