Siglir tar il cuntegn

Header

cuntegn

Investigaziuns encunter Fifa Stefan Keller crititgescha ferm il Tribunal penal federal

L’anteriur procuratur public general extraordinari Stefan Keller ha concretisà sia critica envers commembers dal Tribunal penal federal e la Procura publica federala.

Legenda: Stefan Keller. Keystone

En in’intervista cun la Neue Zürcher Zeitung, ha Keller ditg ch’el n’haja mai survegnì tut las actas en connex cun la procedura penala cunter il president da la Fifa, Gianni Infantino. El suppona che sia lavur saja vegnida impedida sistematicamain. Ed als singuls derschaders al Tribunal penal federal renfatscha Keller ch’els hajan giuditgà per motivs politics ch’el saja partischant en chaussa.

Plinavant renfatscha el als trais derschaders dal Tribunal penal federal ch'i sajan partischants. Dus dals trais derschaders sajan numnadamain sco l'advocat dad Infantino en la PPS dal chantun Turitg. Perquai saja tenor Keller cler che quels hajan vulì avair davent el, gist perquai che sias investigaziuns hajan er prendì en mira derschaders a Bellinzona. Per ils commembers dal Tribunal penal federal stattan davant porta las elecziuns en il parlament quest atun.

Fifa ha dubità qualificaziun da Keller

Dal settember passà fin il matg da quest onn ha Stefan Keller manà las investigaziuns en connex cun ils inscunters betg protocollads tranter l’anteriur procuratur public general Michael Lauber ed il president da la Fifa, Gianni Infantino.

La Fifa ha gì dubis sche Keller saja insumma qualifitgà per questa lavur. Els han protestà pliras giadas davant la dretgira. Keller n'adempleschia cun ses sa cuntegnair gnanc ils standards da basa giuridics. L'entschatta matg ha lura la curt da recurs al Tribunal penal federal communitgà, che Keller saja pregiudizià envers Infantino. Tranter auter han els renfatschà a Keller ina politica da communicaziun betg buna. Suenter quai ha Keller dà giu ses mandat.

RTR novitads 06:00

Artitgels legids il pli savens

Scrollar a sanestra Scrollar a dretga