Siglir tar il cuntegn

Header

cuntegn

Svizra Investurs da l'exteriur surpiglian damain firmas svizras

Pervi da l'aboliziun dal curs minimal da l'euro èn las interpresas svizras vegnidas pli charas per investurs da l'exteriur. Il dumber da surpigliadas da firmas svizras pitschnas e mesaunas è sa reducì l'onn passà per 40%.

Tenor in studi da l'interpresa da cussegliaziun Deloitte èn las bleras firmas svizras vegnidas cumpradas d'interpresas americanas e franzosas. En vista a l'augment da la valita dal dollar pudess quai trend cuntinuar, scriva Deloitte.

Manaschis industrials èn memia chars

Tenor il studi deva quai avant il 2015 las pli bleras surpigliadas da firmas svizras pitschnas e mesaunas en il sectur da l’industria. Quest trend è però sa midà cun la fermezza dal franc. Investurs da l’exteriur prefereschan uss ils secturs da servetsch e da tecnologia.

Cuntrari sa preschenta il maletg viceversa: firmas svizras pitschnas e mesaunas han surpiglià en l’exteriur cunzunt manaschis industrials. Da totalmain 18 surpigliadas han 6 pertutgà la Germania.

Prognosa optimistica per il 2016

Per l’onn 2016 prognostitgescha il studi in moviment pli dinamic da fusiuns e surpigliadas ch’il 2015. Anc adina saja la Svizra in lieu attractiv per investurs svizzers e da l’exteriur. Quai pervi da la cumpetitivitad e la bainstanza dal pajais.

RR novitads 16:00

Artitgels legids il pli savens