La ferma plievgia dals ultims dis ha chaschunà problems en l'Italia dal Nord ed en la Frantscha dal Sid. Chasadas n'han per part gì nagina electricitad ed èn stadas isoladas perquai che bovas èn idas a val. Er il livel dal Lai da Lugano è s'auzà per 25 centimeters, perquai vala il mument il stgalim da privel 3, che munta in privel considerabel per inundaziuns.
Italia dal Nord – punt croda ensemen
Er l'Italia dal Nord patescha vinavant da la blera plievgia. Tar Savona è ina punt da l'autostrada A6 crudada ensemen. Persunas na sajan betg pertutgadas, rapporta l'agentura Ansa. Raschun saja ina bova che haja stgarpà cun radund 30 meters dal viaduct.
Frantscha – duas unfrendas
Suenter ferma plievgia, inundaziuns e bovas èn duas persunas vegnidas salvadas mortas en la Côte d'Azur. Quai han annunzià medias franzosas. Almain duas ulteriuras persunas èn sparidas. Il pli ferm pertutgà èn las regiuns Var ed Alp-Maritimes, nua ch'igl ha pluvì ferm la sonda. Millis chasadas n'han gì nagina electricitad.
RR novitads 18:00