Siglir tar il cuntegn

Header

purtret da jacques de Watteville avant bandiera svizra
Legenda: Jacques de Watteville ha annunzià dad ir en pensiun il zercladur. Keystone
cuntegn

Svizra Jacques de Watteville - in diplomat va en pensiun

Il secretari statal per dumondas da finanzas internaziunalas banduna sin la fin da zercladur il departament dad Ueli Maurer (PPS). Quai ha communitgà il Cussegl federal. De Watteville tegna dentant ses mandat sco chau-negoziader per ils dossiers da l'Uniun Europeica (UE).

De Watteville bandunia il Secretariat da stadi per dumondas finanzialas internaziunalas (SFI) perquai ch'el vegni 65 onns, stat en la communicaziun. Cun la midada dal departament tar cusseglier federal Ueli Maurer (PPS) n'haja quai da far nagut. Quai ha respundì ina pledadra dal departament da finanzas sin la dumonda da l'agentura da novitads sda.

Tgi che succeda al diplomat da la Romandie en funcziun da secretari u secretaria da stadi è anc avert. Il Cussegl federal vegn ad infurmar.

De Watteville e l'Uniun Europeica (UE)

De Watteville e cusseglier federal Burkhalter van sur ina saiv vi.
Legenda: Cun de Watteville e cusseglier federal Didier Burkhalter (PLD) ha la Svizra superà obstaculs en las relaziuns cun l'UE. Keystone

Jacques de Watteville cuntinuescha dentant sia lavur sco chau-negoziader svizzer per ils dossiers da l'UE e resta responsabel per coordinar las tractativas cun l'UE. En quella funcziun è el suttamess al Departament federal d'affars exteriurs. Il diplomat de Watteville è in enconuschider profund da l'UE. El era staziunà dal 1988 a Brüssel ed ha collavurà tranter auter al contract per il Spazi economic europeic (SEE).

De Watteville ed il sectur da finanzas

Sut la batgetta dal secretari da stadi de Watteville sajan vegnidas realisadas en il sectur da finanzas ed impostas internaziunal refurmas impurtantas per la Svizra, scriva il Cussegl federal vinavant. Sco schef dal SFI era de Watteville participà a reglar la dispita dad impostas cun ils Stadis Unids. En consequenza èn vegnidas daperina fin la fin dal 2015 var 2/3 da las bancas svizras cun il ministeri da giustia american.

De Watteville e las relaziuns internaziunalas

En ses temp d’uffizi è vegni levgià l’access al martgà per tut ils affars da servetsch finanzial. Medemamain èn vegnidas auzadas las prescripziuns da chapital en connex cun las reglas da «Too-big-to-fail». La Svizra ha adattà sias leschas cunter il lavar daners e la finanziaziun dal terror.

Grazia a de Watteville vegn la Svizra a far part dal 2016 al proxim inscunter da finanzas dals G20 sut il presidi da la China.

RR novitads 12:00

Artitgels legids il pli savens

Scrollar a sanestra Scrollar a dretga