«Jau n'hai sentì nagina melanconia»

A sia ultima preschentaziun da la bilantscha ha Pierin Vincenz, il CEO da la banca Raiffeisen, pudì preschentar cifras fitg positivas. «Jau sun cuntent e quai è ina buna situaziun per mai», ha Vincenz manegià envers RTR. El n'haja sentì nagina melanconia cun preschentar las cifras.

Il schef da la banca Raiffeisen, Pierin Vincenz. Bild in Lightbox öffnen.

Legenda da maletgs: Il schef da la banca Raiffeisen, Pierin Vincenz. Keystone

Sursiglir cuntegn supplementar

Cifras da Raiffeisen

L'emprim mez onn ha la gruppa Raiffeisen pudì augmentar ses gudogn per bunamain 9% sin 395 milliuns francs. Tant las fatschentas da tschains, da cumissiun sco er quellas da servetsch èn creschidas. En la fatschenta d'ipotecas ha la banca registrà in creschament da 3,7 sin total 154,6 milliardas francs.

El saja sa decidì gia daditg da sa retrair da ses post ed enconuschia il termin dal cumià. «Uschia n’è quai betg uschè melanconic», di Pierin Vincenz. «Pli conscient dal cumià vegn jau durant aperos u sedutas da fatschenta, nua ch'jau realisesch ch'igl è l'ultima giada.»

Emprender è impurtant

En l’avegnir lavura Vincenz anc en divers cussegls d'administraziun (p.ex. Helvetia, Leonteq). Dasper vul el tgirar ses hobis (ir cun skis e dar golf) u prender simplamain temp per el.

Era pussibel èsi che Vincenz cumenza anc in studi u ch’el fa ina scolaziun. El na fetschia dentant nagut totalmain different, mabain insatge che haja ina relaziun cun sia lavur actuala.

«  In post pli impurtant en la politica na vegn jau betg a surpigliar. »

Pierin Vincenz
CEO banca Raiffeisen

Era la politica interessescha

Dentant era la politica interessescha el - gia da chasa anora. El persequiteschia la politica e discussiunia era gugent, sco el di. In uffizi u in post pli impurtant en la politica na vegnia el dentant betg a surpigliar.

L'ultim di da lavur ha Pierin Vincenz ils 30 da settember. Lura banduna el la banca Raiffeisen suenter 16 onns.