Siglir tar il cuntegn

Header

audio
Saira: Jean Philippe Gaudin nov schef servetsch secret svizzer
Or da Actualitad dals 11.04.2018.
laschar ir. Durada: 2 minutas 55 Secundas.
cuntegn

Svizra Jean-Philippe Gaudin: Nov schef da servetsch d'infurmaziun

Il Cussegl federal ha elegì a Jean-Philippe Gaudin sco nov schef dal servetsch d’infurmaziun. L’um da 55 onns è oz attasché da defensiun da l'ambassada Svizra a Paris. Fin l’onn 2015 era el schef dal servetsch d’infurmaziun dal militar.

Gaudin ha fatg carriera en il militar. Dal 1987 è el stà en il corp d'instrucziun per gruppas mecanicas e ligeras. En l’onn 2000 ha el gì il commando dad ina equipa da provediment da l’OSZE a Bosnia-Erzegovina. A partir dal 2003 ha el fatg in studi al Nato «Defence College» a Roma. Suenter è el stà activ en diversas funcziuns da direcziun en il militar. Suondadas èn ulteriuras scolaziuns al «Defence College a Chicksands (GB) ed al Institut des Hautes Etudes de Défense Nationale a Paris. Dal 2008 ha Gaudin surpiglià il post sco schef dal servetsch secret dal militar. Dapi il 2016 è el attasché da defensiun en l'ambassada Svizra a Paris.

Jean-Philippe Gaudin surpiglia il post ils 1. da fanadur. Il vadais surpiglia il post da Markus Seiler che ha manà il post dapi il 2008. Seiler ha midà la fin dal 2017 en l’ uffizi per affars da l’exteriur sco secretari general.

Temp inquiet

Gaudin surpiglia il servetsch da novitads statal en ina fasa inquieta. Dal 2012 aveva in collavuratur engulà datas secretas. Era ha l’affera enturn il spiun svizzer arrestà en la Germania, Daniel Moser, chaschunà temps turbulents.

RR actualitad 17:00

Artitgels legids il pli savens