Siglir tar il cuntegn

Header

audio
Inscunter Biden – Putin: Jürg Lauber davart l'organisaziun a curta vista
Or da Actualitad dals 16.06.2021.
laschar ir. Durada: 04:29 minutas.
cuntegn

Joe Biden e Wladimir Putin «Igl è ina cursa encunter il temp»

Tut il mund guarda quests dis vers Genevra. La Svizra è osp da l'inscunter suprem tranter il president american Joe Biden ed il president da la Russia Wladimir Putin. La sfida organisatorica è gronda: pauc temp d’organisar, e fauxpas na pon ins betg sa prestar.

Tut è planisà sin la minuta, di Jürg Lauber ch'è involvì en l’organisaziun da l'inscunter. L'ambassadur svizzer per l'Organisaziun da las Naziuns Unidas (ONU) di che talmain blers partenaris èn involvids en l'organisaziun – ch'ins gnanca na po dir quantas persunas exact. Dasper la Confederaziun, il chantun e la citad da Genevra sajan er involvids per exempel las autoritads da la Frantscha – cun quai che l'inscunter è in vischinanza dal cunfin.

Jürg Lauber.
Legenda: Jürg Lauber Ambassadur svizzer per l'ONU è entamez las preparativas per l'inscunter. Era sch'il temp è stgars emprova el d'ademplir era tut ils giavischs spezials. Quals che quai èn, na vul il diplomat betg tradir. Keystone
Jau vai respect dentant betg tema che insatge pudess ir sutsura.
Autur: Jürg LauberAmbassadur svizzer per l'ONU

Spetgadas vegnan 1'200 schurnalistas e schurnalists, e per delegaziun in pèr tschient persunas. Igl è il pli aut dispositiv da segirezza che vegn activà. Uschia survegn la polizia era sustegn da l'armada. L'areal enturn la villa La Grange, nua ch'ils dus presidents s'inscuntran, vegn serrà. Perfin las bartgas na dastgan betg pli traversar il lai ed era il spazi d'aria vegn restrenschì.

Tant la collavuraziun cun ils partenaris al lieu sco era cun las differentas delegaziuns saja fitg buna, di Jürg Lauber. Las delegaziuns sajan disadas d'organisar tals inscunters, uschia na dettia quai era betg gronds problems. Dentant las differentas mentalitads han ins adina en il chau. Uschia datti era in u l'auter giavisch spezial.

Dapli da l'inscunter datti era dad udir en il podcast Café federal. Bun divertiment.

RTR actualitad 11:00

Artitgels legids il pli savens

Scrollar a sanestra Scrollar a dretga