Jörg Schneider è mort

L'actur svizzer Jörg Schneider è mort en la vegliadetgna da 80 onns. Sia famiglia ha confermà quai envers la Tagesschau da la televisiun SRF.

Jörg Schneider è mort en la vegliadetgna dad 80 onns. Bild in Lightbox öffnen.

Legenda da maletgs: Jörg Schneider è mort en la vegliadetgna dad 80 onns. Keystone

Enconuschent ad in public pli vast era Schneider gia vegnì l'entschatta dals onns 60 sco bandit en la seria da televisiun «Polizischt Wäckerli». Il pli grond renum aveva Jörg Schneider dentant cuntanschì cun dar sia vusch al chasperet. E Schneider scriveva era sez las istorgias dal «Kasperli». L'onn passà era vegnì enconuschent che Jörg Schneider haja cancer.

In actur magari sutvalità

Persunas dal film e teater svizzer undreschan Jörg Schneider sco in grond actur che haja influenzà la scena da teater e da film svizra, dentant che saja era stà durant in lung temp in actur sutvalità. Schneider haja giugà tant en tocs serius sco era en il teater popular, insatge unic per la scena svizra, ha ditg il schef da film tar l'Uffizi federal da cultura, Ivo Kummer.

Memorias da collegas dal teater

E l’actur Vincenzo Biagi sa regorda da Schneider sco collega fitg empernaivel. Nundumbraivels tocs han ils dus acturs giugà ensemen, e tenor Biagi na saja Schneider betg mo stà sin tribuna plain umor e legher, mabain era privat. Per la manadra dal teater Bernhard a Turitg, Hanna Scheuring, ha Jörg Schneider derasà ina speziala cordialitad.

RR novitads 20:00