Siglir tar il cuntegn
cuntegn

Svizra Johann Schneider-Ammann: «Jau vi esser in tat activ»

Uss cun 66 onns saja permess da reducir in pau. I spetgian anc trais mais cun lavur intensiva sin el. Ma suenter veglia el deditgar dapli temp a la famiglia e daventar in «tat activ». E forsa surpigliar in u l'auter mandat en l'economia. Uschia ha il minister d'economia argumentà sia demissiun.

Legenda: Tadlar il audio Saira: Demissiun JSA – las reacziuns dals parlamentaris grischuns. Durada 03:43 minutas.
03:43 min, Actualitad dals 25.09.2018.

Atgnamain vuleva Johann Schneider-Ammann demissiunar pir venderdi. Las speculaziuns en differentas medias hajan dentant sfurzà el da communitgar gia pli baud sia decisiun, ha el ditg cun in surrir avant las medias a Berna. Surtut era per proteger sia famiglia: El na vuleva betg che sia dunna stoppia dir manzegnas sin la dumonda: Chala el u resta el?

Johann Schneider-Ammann ha era fatg fin cun las speculaziuns davart sia sanadad e ditg ch'el saja anc fit.

Cun mai vai bain, jau sun viv
Autur: Johann Schneider-AmmannCusseglier federal partent

Il cusseglier federal partent sa legria sin l'Engiadina, nua ch'el haja ina chasa, sco era sin il moviment en la natira.

La Svizra è in «petit paradis»

El giavischia per il futur in maximum d'investiziuns en chaus e mauns da la societad, uschia Schneider-Ammann. La Svizra saja in pitschen paradis. Quai stoppia esser per la Svizra adina puspè motivaziun per tschertgar l'innovaziun. I saja stà in'onur da servir a la Svizra.

En quest senn ha il president dal Cussegl naziunal, Dominique de Buman, prelegì la decleranza da demissiun.

President dal Cussegl naziunal prelegia la decleranza da demissiun

Johann Schneider-Ammann è vegnì elegì il 2010 en il Cussegl federal sco successur da Hans-Rudolf Merz. Il magistrat da la Partida liberaldemocratica era sa fatg valair cunter l'anteriura directura per segirezza dal Son Gagl, Karin Keller-Sutter, oz presidenta dal Cussegl dals chantuns. Ella vegn ussa menziunada sco candidata pussaivla per il cusseglier federal partent.

Laud per Schneider-Ammann

Gia paucas minutas suenter il president dal Cussegl naziunal è era Karin Keller-Sutter s'exprimida. I na saja anc betg temp per in cumià, Schneider-Ammann haja anc ina detga lavur da far.

Igl è segiramain oz gia uras d'engraziar cordialmain per Vossa grondiusa lavur e per Voss engaschament per la populaziun e la Svizra.
Autur: Karin Keller-SutterPresidenta dal Cussegl dals chantuns

RR novitads 10:00++