Siglir tar il cuntegn

Header

Navigaziun

Il president da la Banca Naziunala Thomas Jordan
Legenda: Per il president da la Banca Naziunala Svizra Thomas Jordan n'è ina garanzia dal curs minimal betg ina mesira a lunga vista. Ussa gidia il tschains directiv bass la branscha d'export. Keystone
cuntegn

Svizra Jordan: «Limita è adina stada ina mesira cun termin»

Suenter che la banca naziunala svizra ha annunzià d'abolir il curs minimal da l'euro è l'index da la bursa svizra crudà, turissem ed industria èn skeptics, ed il cussegl federal dat la parola da perseveranza.

Il president da la Banca naziunala svizra Thomas Jordan ha declerà ch'ina tala midada da la politica monetara stoppia vegnir surprendentamain. Quai tranter auter era per evitar eventualas fatschentas «dad insiders» illegalas. Pia che persunas ch'han dapli infurmaziuns pudessian profitar da la situaziun e manipular il martgà.

Jordan ha era puntuà che la Banca Naziunala Svizra cunscienta che la midada vegnia ad avair consequenzas negativas sin la bursa ed era sin l'economia svizra.

  • Pertutgant la bursa è el però persvadì che la crudada da l'index vegnia ad esser mo a curta vista - pia che la situaziun sa normaliseschia.
  • Pertutgant l'economia svizra puntuescha Thomas Jordan che questa haja pudì sa revegnir durant il temp da la limita dal curs en vigur, ed era sa preparar sin la situaziun ussa. A lunga vista na saja ina tala limita betg raschunaivla.

Las mesiras centralas

L'avantmezdi aveva la Banca naziunala communitgà da schliar per immediat la limita da curs da l'euro da CHF 1.20 che valeva fin ussa. Persuenter ha la banca sbassà ina segunda giada il tschains directiv. Quai suenter la reducziun dal tschains directiv en in negativ il december passà. Questa mesira gidia il franc, uschia il president da la Banca naziunala svizra Thomas Jordan.

Las reacziuns dals martgads èn per part massivas

Curva dal curs da l'euro che croda massiv
Legenda: Enturn las 10:48 è il curs da l'euro cruda sin 0,79 raps. SRF

Reacziuns vehementas ha quai dà tar ils curs monetars. L'euro è per part crudà sin 85 raps. Pli tard è'l però sa stabilisà sin 1 franc e 03 (tar ils curs actuals). Il dollar era anc d'avair per 70 raps. L'ultima giada era l'euroa crudà uschè massiv l'avust 2011 - curt avant l'introducziun dal curs minimal.

Experts quintan ch'il curs a val da l'euro dastgassia anc vegnir accellerà las proximas emnas, quai sche la banca centrala europeica decida da schluccar sia politica monetara.

Schneider-Ammann: «Hai confidenza che firmas dumognan»

Il cusseglier federal Johann Schneider-Ammann en posa pensiva
Legenda: Il cusseglier federal Johann Schneider-Ammann sa dat pli optimistic ch'ils turistichers. Reuters

Il minister da l'economia Johann Schneider-Ammann è stà surprendì da la decisiun da la banca naziunala d'abolir il curs minimal da CHF 1.20 per l'euro. La decisiun mettia il turissem e l'economia avant grondas sfidas. Mo Schneider-Ammann è dal maini che l'economia svizra vegnia a s'arranschar cun la nova situaziun. Pli impurtant saja quai ussa che la Svizra possia segirar ils contracts bilaterals cun l'Uniun Europeica.

Partidas ed uniuns reageschan critic

Las partidas burgaisas èn plitost cuntentas cun l'agir da la Banca naziunala, las partidas da la sanestra vesan surtut ina smanatscha. La ministra da finanzas, Eveline Widmer-Schlumpf, n'ha per il mument betg vulì prender posiziun en chaussa.

L'Uniun sindicala fa quitads per plazzas da lavur e pajas. L'Uniun dals patruns ha declerà ch'il temp da bandunar il curs minimal saja mal tschernì. Grondas malsegirtads politicas sco era economicas engreveschian gia ussa avunda las fatschentas da l'economia.

Plinavant creschia il privel per ina deflaziun e per ina spirala negativa da pretschs sbassants, quai che mainia ad in consum pli pitschen.

Legenda: Guardar il video Las emprimas reacziuns dal turissem grischun. Durada 02:39 minutas.
Or da Telesguard dals 15.01.2015.