Il president da Swiss Olimpic, Jörg Schild, lascha anc adina avert, schebain ins candideschia insumma per ils gieus olimpics d'enviern dal 2026 u betg. Sper il Grischun èn anc quatter auters projects annunziads. Quai anc il Vallais e dus projects surregiunals.
Anc uss vegnian tuts quatter projects sustegnids medemamain, Schild. Ins saja anc en l'emprima fasa da planisaziun e perquai sapientivamain anc betg tar ils detagls. Questas quatter gruppaziuns han anc peda fin mez december da sviluppar lur atgnas ideas. Silsuenter surpiglia Swiss Olimpic il timun. Lura vegnan evaluads ils projects e decidì davart ina candidatura. Pussibel saja era ina maschaida da plirs projects. Il mars 2017 decida il cussegl executiv da Swiss Olimpic, tge candidatura ch'el vegn a proponer al parlament. Ils gieus vegnan surdads l'atun 2019.
Budget da 24 milliuns francs
Cumpareglià cun ils 60 milliuns francs da la candidatura grischuna dal 2022 quinta Schild cun in budget da 24 milliuns francs per questa candidatura. Mintgamai in terz hajan la federaziun, Swiss Olimpic e las regiuns interessadas da surpigliar. Uschia na stoppia betg in chantun purtar sulet ils custs.
Quai che pertutga il budget per ils gieus olimpics d'enviern quinta Swiss Olimpic cun 1,65 milliardas francs. En questa summa na sa chattian nagins daners publics.
La consultaziun dal Cussegl federal ed il consentiment stuessan succeder tranter il december 2017 ed il mars dal 2018. Quest process pudess sa cruschar cun l'inoltraziun formala da la candidatura tar l'IOC. En la segunda mesadad dal 2018 stuess lura succeder la votaziun tar il pievel. Quest è il pli probabel la pli greva part tar la candidatura. Era las debattas tranter il Cussegl naziunal e dals chantuns stuessan capitar durant quest temp.
RR novitads 20:00