Suenter che Karin Keller-Sutter ha annunzià a Wil (Son Gagl) sia candidatura, vegn la nominaziun entras la partida chantunala e la fracziun a Berna mo pli ad esser ina chaussa formala. Actualmain è la politicra presidenta dal Cussegl dals chantuns.
Déjà-vu suenter otg onns
Gia avant otg onns aveva Karin Keller-Sutter gì ambiziuns da vegnir en il Cussegl federal. Lura aveva l'Assamblea generala dentant dà preferenza a Johann Schneider-Ammann, ed elegì quel sco cusseglier federal liberaldemocrat.
Il 2010 valeva Karin Keller-Sutter anc sco politicra betg elegibla cunzunt per la sanestra, lura era sia lingia anc memia dira. Quai è sa midà ils davos onns. En il Cussegl dals chantuns ha la politicra sviluppà ina buna rait, e vegn adina puspè da fular via per cumpromiss. Plinavant ha ella schlargià ses spectrum da tematicas, dasper la politica d'asil è ella uss era cudeschada en fatgs da la sanadad e da l'Europa.
L'urari da la PLD
La PLD prevesa il suandant proceder las proximas emnas. Fin ils 24 d'october ston las partidas chantunalas annunziar las candidaturas. Lura datti ils 16 da november la nominaziun entras la fracziun. Ed ils 5 da december han lura lieu las elecziuns per ils sezs vacants en il Cussegl federal.
RR actualitad 15:00
