Siglir tar il cuntegn

Header

cuntegn

Svizra Karl Erb è mort

Il reporter da sport legendar Karl Erb è mort en la vegliadetgna da 92 onns a Muralto. Bunamain 20 onns ha Karl Erb commentà a la televisiun svizra occurrenzas da sport, quai tranter il 1962 ed il 1981.

Sia vusch è ferm colliada cun cursas da skis e da passlung, il siglir cun skis, cursas da la furmla 1 sco era chalvatgar. Cult è co el ha commentà cun vusch fitg emoziunala la cursa da Bernhard Russi al titel da campiun mundial il 1970 a Val Gardena. Karl Erb è quella giada vegnì crititgà d'esser stà memia emoziunal. Pli tard ha Bernhard Russi assistì sco co-commentatur. Plinavant ha Karl Erb er gì numerusas funcziuns naziunalas tar il sport d'elita.

El ha era scrit plirs cudeschs da sport, sco per exempel purtrets da Bernhard Russi, Heini Hemmi e Franz Heinzer sco era il classicher «Faszination Abfahrt» e las annalas «Sport Hits».

Tochen tar sia mort è el stà in persequitader critic dal sport. Er sch'el ha il davos be pli pudì tadlar e betg pli guardar sport. Erb pativa d'ina malsogna dals egls. Intellectual e retoric è el dentant stà alert fin la fin.

RR novitads 12:00

Artitgels legids il pli savens