Siglir tar il cuntegn
Inhalt

Svizra Kiosks pretendan 30 raps per in satg da plastic

A partir dal november ston ins pajar en kiosks almain 30 raps per in satg da plastic. Quai ha annunzià Valora, l’interpresa che maina ils kiosks. Pertutgads èn tuts posts da vendita en Svizra. Tar quels tutgan las fatschentas da «K Kiosk», «Avec» e «PressBooks».

satgets da plastic
Legenda: Dapi il 2016 pretendan Coop e Migros 5 raps per ils satgets da plastic. Keystone

Per ils satgets da plastic pretenda Valora 5 raps, per tastgas da palpiri 20 raps e per ils satgs da plastic 30 raps. Cun far pajar per ils satgs da plastic vul Valora reducir rument.

En il Migros e Coop pajan ins dapi il 2016 per satgs da plastic. La taxa per ils satgets han ils detaglists dentant introducì sin squitsch da la politica. Persuenter ha il parlament svizzer desistì d'introducir in scumond dals satgets da plastic.

Er Nestlé fa part

Tar Migros e Coop n'è la taxa anc betg realisada consequentamain dapertut. Per part datti anc adina satgets gratuits en singulas filialas pitschnas. L'annunzia da Valora arriva sulet in di suenter ch'il concern da nutriment Nestlé ha annunzià ch'el haja suttascrit la cunvegna da plastic «New Plastics Economy» da la fundaziun Ellen MacArthur e da l'ONU. Cun la cunvegna s'obligheschan las firmas da reducir il rument da plastic.

RR novitads 14:00