Siglir tar il cuntegn
Inhalt

Svizra Köppel: «Las taxas da la Billag èn tissi per il mund da medias»

La PPS è persuenter d'abolir las taxas per radio e televisiun. Cun in cler resultat da 239 cunter 17 vuschs tar 5 abstenziuns ha la Partida populara svizra decidì la parola «gea» per l'iniziativa No Billag.

Cartas da votaziun.
Legenda: A la testa dals aderents stat il cusseglier naziunal e schefredactur da la «Weltwoche». Keystone

La posiziun da la suprastanza da la Partida populara svizra è er sa messa tras en la partida. Ella aveva decidì da dir «gea» a la No Billag cun ina maioritad da 23 cunter 3 vuschs tar ina abstenziun,

Tissi e plattafurma per propaganda da la PS

In dals gronds aderents da l'iniziativa No Billag è cusseglier naziunal e schefredactur da la gasetta «Weltwoche» Roger Köppel. Tenor el èn las taxas da radio e televisiun tissi per il mund da las medias. Perquai ch'ella saja finanzialmain dependenta dal stadi pensia la SRG er sco il stadi, pretenda Köppel. I saja senza problems pussaivel da cuntentar il basegn d'infurmaziuns cun interpresas da medias privatas – e quai en tut las quatter linguas naziunalas.

Curt avant decider la parola ha er la cussegliera naziunala Céline Amaudruz cusseglià als delegads da spargnar las taxas da la Billag. La Partida socialdemocratica stoppia en futur finanziar sezza sia propaganda, ha ella crititgà cun il resun d'applaus.

Mo paucas cuntravuschs

Opposiziun cunter l'iniziativa hai entaifer la PPS dà pauca. In delegà da Lucerna ha regurdà a las minoritads ed a las regiuns perifericas. Sco aderent da la cultura populara stoppia el dir «na» a l'iniziativa. In delegà dal Vad ha fatg attent ch'ils votants da la PPS en las regiuns ruralas schazegian la SRG.

RR novitads 16:00