Siglir tar il cuntegn

Header

cuntegn

Svizra L'anteriur diplomat Luzius Wasescha è mort

L'anteriur diplomat svizzer Luzius Wasescha è mort cun 70 onns. Suenter ina prelecziun ch'el ha tenì a l'universitad da Turitg n'è el betg turnà a chasa. A la staziun da Berna è el vegnì sut in tren en. El ha represchentà durant decennis la Svizra en la politica da commerzi.

Il professur per studis europeics a l'universitad da Fribourg, Gilbert Casasus, ha publitgà in necrolog sin il portal da novitads da la Svizra romanda hebdo.ch. Luzius Wasescha saja stà in dals megliers diplomats svizzers, scriva Casasus.

In da noss megliers diplomats.
Autur: Gilbert Casasus Professur per studis europeics a l'universitad da Fribourg

Ils onns 1990 ha Wasescha gì ina rolla decisiva en las tractativas da la runda dad Uruguay davart il commerzi mundial ed en las tractivas bilateralas cun l'Uniun europeica. Pli tard ha el represchentà la Svizra, tranter auter, tar l'organisaziun mundiala da commerzi WTO.

Suenter sia pensiun ha Luzius Wasescha lavurà sco docent a las universitads da Berna, Genevra e Son Gagl.

audio
Bunura: Luzius Wasescha – Savognin sco lieu dals perdavants/Parc Ela
ord Actualitad dals 19.10.2016.
laschar ir. Durada: 3 minutas 43 Secundas.

Ragischs en Grischun

Luzius Wasescha è creschì si a Montreux, ha dentant gì perdavants a Savognin. Dentant pir tras la scola d'uffiziers a Bièrre l'onn 1971 ha el cumenzà a fabritgar si ina relaziun cul lieu. La culpa era Baltermia Peterelli, ch'aveva fatg la scola ensemen cun el.

Pli tard lura è Luzius Wasescha daventà president da l'Uniun Parc Ela, quai sin iniziativa da Peterelli ch'era da quel temp president da la regiun Surses.

El è stà bun da fabritgar punts.
Autur: Sepp Waldegg Possessur da l'hotel Piz Mitgel a Savognin
audio
Bunura: Luzius Wasescha – Savognin sco lieu da lavur
ord Actualitad dals 19.10.2016.
laschar ir. Durada: 3 minutas 15 Secundas.

A Savognin ha l'anteriur diplomat ed amabaschadur era fatg contractivas cun las pli differentas delegaziuns. Tranter auter è in contract bilateral cun l'Uniun Europeica vegnì suttascrit a Savognin en l'hotel Piz Mitgel da Sepp Waldegg.

RTR novitads 20:00

Artitgels legids il pli savens