Siglir tar il cuntegn

Header

Il quantum d'aua dals ultims dis correspunda a la media d'in entir mais da matg.
Legenda: Il quantum d'aua dals ultims dis correspunda a la media d'in entir mais da matg. Keystone
cuntegn

Svizra L'aua tschessa - privel moderà

L’intensiva plievgia dals ultims dis è tschessada durant la dumengia. Las autoritads han annunzià ina precauta fin d’alarm. Tuttina: Er per ils proxims dis vala quai da far dapli attenziun en la vischinanza da flums, lais ed auals.

Tenor il bulletin per privels natirals da la Confederaziun, il link avra en ina nova fanestraavrir en il browser datti vinavant in aut privel d’aua gronda al Lai dals Quatter Chantuns, al Lai da Turitg ed a l’Aara sut il Lai da Thun.

Il stgalim da privel dus da tschintg (moderà) munta che la deflussiun en flums e dutgs è pli aut ch’en media. El schai dentant sut il cunfin d’aua gronda.

Uschia èsi tenor las autoritads er nunprobabel ch’i dat inundaziuns. Cumplettamain sclauder na pon ins dentant betg quest privel. En cas d’excepziun po quai localmain dar inundaziuns da sutpassadis, garaschas sutterranas e tschalers. Er bloccadas da vias da traffic e localmain pitschens donns na pon betg vegnir excludids.

Bletscha Svizra Centrala

En tut è la situaziun sa schluccada en il decurs da la dumengia da Tschuncaisma. En tuttas regiuns è la plievgia tschessada marcantamain a bun’ura, u ch’igl è schizunt cumplettamain sitg. Quest’aura cun scleridas localas procura vinavant per ina deflussiun da l’aua.

Dapi la gievgia aveva quai dà en la Bassa tanta plievgia sco en media d’in mais da matg. Il pli fitg pluvì ha quai tenor las autoritads federalas en il center e l’ost da la costa nord da las Alps. Qua ha quai aifer trais dis dà tranter 100 e 140 liters plievgia per meter quadrat, cun extrems da fin 170 liters per meter quadrat en la regiun dal Lai dals Quatter Chantuns.

Tenor il servetsch d’aura MeteoNews hai dà sin il Säntis 265 liters/m2 dapi la gievgia – la pli auta quantitad mesirada.

La pli auta deflussiun ed ils pli auts nivels da las auas èn vegnids observads en blers lieus tranter sonda suentermezdi e sonda saira. Sin il Rain ha il traffic da bastiments stuì vegnir interrumpi. Dapi dumengia avantmezdi tschessan las auas dapertut. Mo il nivel dal Lai da Constanza pudess anc crescher levamain fin glindesdi.

RR novitads 12:00

Artitgels legids il pli savens