Er il proxim temp na vegni betg a dar navadas. Glindesdi saira vegni bain in zichel pli fraid ed il cunfin da naiv sa sbassa sin 1'500 meters sur mar, ma i vegni be a naiver in per paucs centimeters, sco SRF Meteo di. Gievgia vegni lura puspè pli chaud ed il cunfin da naiv fugia sin 1'800 meters sur mar.
Probabel sa mida l'aura lura proxima emna ed i vegn a dar in zichel naiv nova. Nua e quant bler saja uss dentant anc memia baud da dir, manegia Sabine Balmer da SRF Meteo.
La pli chauda notg da schaner dapi 1864
Anc mai, dapi ch'ins ha cumenzà a mesirar, hai dà uschè chaudas temperaturas il schaner. A Delemont èsi vegnì il prim da schaner 20,2 grads chaud, in record per la vart dal nord da las alps.
Ed anc mai hai dà uschè ina chauda notg sco quella ad Altdorf en Svizra. Il termometer n'è mai crudà sut 15,5 grads; la pli chauda notg da schaner dapi silmain 1864, cura ch'ins ha cumenzà a registrar las temperaturas tenor Meteo Svizra. Er a Cuira e Tavau eri cun silmain 15 e 9 grads bravamain chaud la notg, omadus records locals.
Tenor SRF Meteo n'èsi betg dapertut uschè chaud: a Schiers èsi per exempel stà mo -0,1 grads a las 07:30. Il motiv per las temperaturas è il favugn che porta actualmain temperaturas autas sur ina gronda part da l'Europa.
