«Igl era nunusità da star uschè savens davant la camera. Ed jau hai stuì emprender ordadora bler text», raquinta Neah Hefti a chaschun da sia emprima premiera dal kino a Turitg, «ma la glieud era fitg amiaivla, perquai ma sentiva jau bain.»
Ils 16 d'avrigl ha il giuven talent cun «Plitsch Platsch Forever» gì ses debut da kino. En quel vulan Pola (Neah Hefti) e sia meglra amia Polly passentar lur vacanzas da stad en il bogn «Plitsch Platsch». Ma cura che l'indriz da filters na funcziuna betg pli, sto il bogn avert serrar ed ils geniturs da Polly che mainan l'ustaria van a star cun lur figlia en il Canada.
Quai na po Pola betg laschar seser sin sai. Ella fa novas amicizias e fa plans per tuttina anc salvar ses bogn avert amà.
Filmà è vegnì «Plitsch Platsch Forever» la stad 2025 en la «Badi Geeren» a Birmensdorf: durant las vacanzas da stad, per ch'ils uffants na stoppian betg lavurar durant il temp da scola. Per Neah Hefti èsi l'emprima rolla principala d'in film da kino.
-
Bild 1 von 5. Pola (Neah Hefti) e sia amia Polly vulan passentar ina stad senza difficultads en il bogn avert. Bildquelle: Catpics / SRF.
-
Bild 2 von 5. Pola (Neah Hefti, a dretga) e sia nova amia Rosalie fan bler per salvar lur bogn avert – er ina giada a l'ur da la legalitad. Bildquelle: Catpics / SRF.
-
Bild 3 von 5. Patrick Frey gioga in um pensiunà, che viva quasi en il bogn avert «Plitsch Platsch». Bildquelle: Catpics / SRF.
-
Bild 4 von 5. Sautar per il bogn avert – «Plitsch Platsch Forever» gioga cun ils meds stilistics da videoclips. Bildquelle: Catpics / SRF.
-
Bild 5 von 5. Chauma da seser – la populaziun da Rotwil s'engascha per il bogn avert – en il vair senn dal pled. Bildquelle: Catpics / SRF.
Experientscha sco actura en reclamas
Experientschas cun lavurs da filmar ha Neah gia fatg avant il set da «Plitsch Platsch Forever». Ella ha gia giugà en spots da reclama per la Migros u per las Viafiers federalas.
Ma Neah na sa senta betg mo bain sin sets da film, mabain era sin la plazza da ballape. Ella trenescha tar il club da ballape ad Adliswil ed emprova da chattar temp per quest hobi sper la scola ed ils films.
Questa stad mida ella da la scola primara en la scola secundara e fa gia ponderaziuns davart la tscherna da professiun.
Sch'i na gartegia betg cun la carriera sco actura, poss jau era m'imaginar da lavurar sco architecta d'interiurs.
«Jau persequitass natiralmain gugent vinavant ina carriera sco actura», di Neah Hefti, «ma sche quai na gartegia betg, pudess jau era m'imaginar fitg bain architecta d'interiurs sco professiun. Jau less pir ina giada guardar co ch'i va vinavant.»
Hefti daventa Heidi
Ina chaussa è dentant gia ussa clera: Neah Hefti stat bainprest puspè davant camera. Ella è la pli nova «Heidi». En ina seria televisiva svizra-tudestga coproducida da SRF e da l'emettur tudestg RTL.
En in grond casting è Neah sa messa tras cunter numerusas concurrentas ed è gia viagiada en Germania per emprimas lavurs da filmar. L'onn 2027 vegn la seria lura emessa.