Tar il vent vegnan plievgia e naiv
Ensemen cun ils ferms vents arrivan era plievgia e naiv en Svizra. Suenter ina fasa pli quieta il gliendesdi durant il di, suondan lura plievgia e naiv. Ils vents restan dentant ferms. La notg sin il mardi lura spetga SRF Meteo cunzunt en il Grischun dal Nord sur 800 meters, 10 fin 50 centimeters naiv nova. Quai fin mardi a mezdi. Cunquai ch'i po vinavant dar vents ferms procuran quels per cuflads, uschia che las differenzas quanta naiv ch'i dat, pon esser grondas tut tenor regiun.
«Antonia» ha purtà ferms vents
I vala il stgalim da privel trais. Sur notg hai en la Bassa suflà fin a 100 kilometers l'ura. Il pli ferm vent è vegnì mesirà sin il Chasseral en il Giura Bernais cun passa 160 kilometers l'ura.
En il Grischun hai dà il pli ferm vent sin il Crap Masegn, sin territori da Falera, quai cun 155 kilometers l'ura. Cun questas spertadads n'han pliras pendicularas betg pudì avrir. Donns pli gronds n'hai fin uss betg dà.
Tras quests vents ferms pudessan era plantas cupitgar. I vegn perquai scusseglià dad ir en guauds u a l’ur dal guaud.
Gia ils davos dis aura selvadia
Plirs stemprads han tutgà ultimamain l'Europa, suenter «Ylenia» ha il venderdi l'orcan «Eunice» procurà per mortoris e devastaziuns en l'Engalterra, en ils pajais dal Benelux ed en la Germania dal Nord. La Svizra è mitschada cun in egl blau la notg sin la sonda, il pli ferm vent en ils culms han ils meteorologs mesirà sin il Säntis cun 117 kilometers l'ura.
